كوريا الشمالية

علم كوريا الشماليه



كوريا الشماليه ، الاسم الرسمى جمهورية كوريا الديموقراطيه الشعبيه هى بلد فى النص الشمالى من شبه الجزيره الكوريه فى شمال شرق اسيا بين بحر اليابان و النهر الاصفر.بيحيط بيها من الشمال روسيا (19 كم م الحدود المشتركه) و الصين (1416 كم) و من الجنوب كوريا الجنوبيه (238 كم).الحدود بينها و بين كوريا الجنوبيه المفروض انها تكون منزوعة السلاح بس فى الحقيقه المنطقه متعسكره بشكل حاد قوى لدرجة ان عدد العساكر على الجنبين بيتقدرو باكتر من مليون واحد.اليابان من جيرانها القريبين التانيين و بيفصلهم عن بعض بحر اليابان.عاصمة كوريا الشماليه بيونجيانج بتعتبر مركز صناعى و اقتصادى مهم و مكانها على الساحل الغربى لشبه الجزيره.
حزب العمال الكورى بيحكمها من سنة 1948 لوحده و كيم جونج ايل هو سيكيرتير عام الحزب و القائد الاعلى لكوريا الشماليه
التاريخ
بعد تحرير كوريا من الاحتلال اليابانى مع نهاية الحرب العالميه التانيه، اتقسمت شبه الجزيره الكوريه بقرار من الامم المتحده لبلدين بيفصل بينهم خط العرض ال 38 و سيطر الاتحاد السوفييتى على النص الشمالى (حوالى 55% من مساحة شبه الجزيره)و سيطرت امريكا على النص الجنوبى.ابتدا التاريخ الحديث لكوريا الشماليه باعلانها كجمهورية شعبيه سنة 1948.
السياسه
متحف حرب تحرير ارض الاباء فى بيونجيانج بيصور الزعيم كيم ايل سونج و الجيش من وراه



كوريا الشماليه هى جمهوريه اشتراكيه بحسب الدستور بتاعها بس بيعتبرها محللين سياسيين كتار (غربيين)انها ديكتاتوريه مطلقه على الطريقه الستالينيه.كل مفاصل و اجهزة الدوله ماشيا بنظام الحزب الواحد و الحزب المسيطر على كل حاجه هو الحزب العمال الكورى الشيوعى و اللى دوره قى قيادة البلد متأصل بنص الدستور.فى كمان جزبين صغيرين تانيين فى كوريا الشماليه و الاحزاب التلاته دول منضمين سوا تحت جبهه واحده اسمها الجبهه القوميه لاعادة توحيد ارض الاباء. البرلمان هو اعلى اجهزة الدوله و بينتخبو اعضاءه مره كل خمس سنين، بينعقد البرلمان مره واحده او مرتين فى السنه و فى غير اوقات انعقاده بيقود البلد الرئيس بتاع البرلمان. من الاجهزه المهمه التانيه فى البلد اللجنه القوميه للدفاع و دى مسئوله عن السياسات الخارجيه و كمان عن القوات المسلحه. من ساعة اما مات كيم ايل سونج سنة 1994 و منصب رئيس الدوله فاضى لانهم ادوله لقب الرئيس الابدى بتاع كوريا الشماليه.
القوات المسلحه و الامن
من اول سنة 1966 ابتدت كوريا الشماليه فى التركيز على الجيش و انه يكون دايما فى حالة استعداد و عشان كده غيرو الخطط بتاعة الاقتصاد و وجهوها اكتر ناحية تطوير القوات المسلحه بتاعتهم اللى بتعتبر واحده من اكبر الجيوش على مستوى العالم كله.القوات المسلحه متقسمه تلات فروع : الجيش و القوات الجويه و القوات البحريه.التجنيد الاجبارى فرض على كل الرجاله فى كوريا الشماليه و على نسبه معينه كمان من الستات و مدة الخدمه الرسميه ما بين تلات و اربع سنين بس فى الحقيقيه بتكون اطول من كده بكتير.فى كمان عدد كبير من قوات الاحتياط و القوات الباراعسكريه (زى البوليس).جهاز الامن الداخلى كبير و معقد و وظيفته مراقبة و التحكم فى تحركات الناس و نشاطاتهم الاجتماعيه و حتى جوا بيوتهم.وزارة الامن العام مهمتها السيطره على الوضع الامنى جوه البلد انما الامور السياسيه و عمليات المخابرات فبتتبع جهه تانيه اسمها جهاز امن الدوله.

العفو شكرا للمرور
المصدر ويكبيديا